Yeni il və heçdə yeni olmayan əhval ümumiyyə!
Sorumlu müdür və baş yazar :
Dr. Hüseyn Şərqidərəcək (SOYTÜRK)
مدیر مسئول و سردبیر :
دکتر حسین شرقی دره جک ( سوی تورک)
اولکه خارجی تهدیدلر هم ده داخلی اعتراضلار اوزوندن هئچ ده عین آچان دئییل. ائله بیل حیات سونمک ده اولان بیر چیراغین ایشیغین ده جان چکیشرک داوام ائتمک ده دیر. والدینلر پریشان اوولادلار نگران دی. جیبلر بوش قیمتلر عرش آسماندیر. بوراخ یاشاماغی دیری قالماق بئله الله ا آماندی.
تحصیل سیستمی چوکموش اوزاقدان کومانداندی. هوا کیرلیلیی حد نرمال دان آشمیش سرطان سلطاندی. هله بونلار ندیر کی خسته لازیم اولان درمان جیب یاخاندی. ات دئییلن شئی ال چاتمازدی زیاندی. گوندلیک اویرنیب و هرکسین ییه بیله جه یی دویو جیران بئلینه مینیب. دویو اولسا یاغ یوخدور یاغ اولاندا یومورتا.
تک امیدیمیز قایقاناق ایدی اودا آرتیق لاکچری خورک استاتوسوندادی.
یول کرایه لری باهادی حرکت ائتمک چتین و خرج اضاف دیر. یئمک خانالار بوم – بوش داواخانلار رواندی. سوزون قیسساسی یاشماق چوخ ال آماندی. هله ائو اجاره سی مکتب و دانشگاه شهریه سی وئرریرسن اگر گرچکدن ائوین ویراندی. بو قاریشمیش دکان دا هاوا یامان – یاماندی. اللر گوی ده الله آماندی. ایشچی امک حاققی 100 دلاردی اتین کیلوسو 15 دلاردی.
پاپاغینی برک توت دئییرلر خیلی بحراندیر. یارانه و کالا برگ ده گرچک یالاندی. اینانمیان بی ایماندی. اوزلر سولغون اورکلر یارالی گنچلیک فغان دی. ائولیلیک رویادی ائو آلماق خولییادی. بورا گرچکدن یوروین امیدلرین مزارلیغی دیر. ایش و اکمک حیات و ممات مسئله سی دیر.
بیلیرم " بلا گر همگی باشد گواردی" یادا یورغانا بورون ائلینن سوروندو. بونلارین هامیسی بیر یانا اللر تتیک ده جنگ قاپیدادی. ایچری ده اوزوموز اوزوموزو ایسته میریک دیشاری دا هئچ کس بیزی ایسته میر. اولوم و اومیدسیزلیک قوخوسو هاوادادی. الله دان باشق گمان یوخدور. قونشو – قونشویا خوخدور. ایچی بوش شعارلار ایسه قولاغی کیرلدن رادیاسیادی. بوتون مدنی و اجتماعی ایستکلر آجلیق کولگه سینده اویوماقدادیر.
باخ بئله جه گئدیریک یئنی ایلی یعنی 1405 جی ایلی قارشیلاماغا. دیرلی وطنداشلار اصیل میللتیم گوزل سویداشلاریم. یئنی ایلینیز دوشرلی اولسون. آذربایجان ایسه تاریخ ده سون شانسینی یاشاماقدادیر. یا قازان یا یوخ اول وضعیتی بو گون تاریخی شانسین گورنتولری دیر. ایگید گرک اویمایا فله یین فعلینه بئل باغلایا اوز ائلینه.
بیر ایل ده سیزینله اولدوق و خدافرینی سیزلره تقدیم ائتدیک.