مدیر مسئول و سر دبیر : دکتر حسین شرقی دره جک

SORUMLU MÜDÜR VƏ BAŞYAZAR : Dr.HÜSEYN ŞƏRQİDƏRƏCƏK SOYTÜRK

دئمک اولار کی دونیادا هر یئرین ده اینسانلار دوغما دیللرین ده یازیب اوخوما حاققینا صاحیب دیرلر. آنجاق بعضی اولکه لرده آزینلیقلارین دیلی چوخونلوقلارین دیلینه اوستون امتیازلارلا سیاسی آماجلا دا اولسا بیرینجی درجه لی امتیازلار ساغلانماقدادیر. بیزیم اولکه میز ده ده مختلیف میللت و قوم لرین یاشاماسینا باخمایاراق بیر نئچه قووم و میلتلرین دیلینده او جومله دن فارس , عرب و ارمنی دیللرین ده تحصیل واردیر. باخمایاراق کی تورکلر اولکه نین اساس ائتنیک توپلومونو تشکیل ائتمک ده دیر و عالی مسئول مقاملاردا دا تمثیل اولونماقدادیرلار لاکن سیاسی آماج سببیندن بیز تورکلرین دیلین ده درس و تحصیل سیستمی یوخدور.

تحصیل سیستمینه داخیل اولمویان هر هانکی بیر دیل واحدی ایسه زامانلا رسمی اولان دیلین تاثیری آلتینا دوشمکله اوزله شه بیلر. دیل یالنیز بیر میلتین دانیشماق احتیاجینی تامین ائتمکدن عبارت دئییل. بیلیر کی , دیل دینامیک و جانلی مدنیت قورویوجوسو و داشیجیسیدیر. تحصیله داخیل اولمایان دیل زامانلا اولوب یوخ اولا بیلر.  بیر دیلین محو اولماسی ایله یاناشی او دیل واسیطه سیله یارانان مدنیت و یا دا مدنیت المنتلری ده یوخ اولوب تاریخدن سیلینیر.

یعنی موضوع تکجه تورک دیلینین درس وئریلمه مه سی دئییل,  بلکه دیلمیزین اونودولماسی ایله یاناشی دده – بابا قایدالاریمیزی دا اونودموش اولوروق. بو فاکت ایندی اجتماعی و پسیخولوژی حتی شخصیتی و نهایت ده سیاسی موشکوللره ده سبب اولا بیلر. هویتی و تربیتی مشکوللرین آنا سببینین بیری ایسه میللی کولتور و فرهنگ دن یوخسون اولماقدیر. بیز دیلیمیزی تحصیل ائتمه دیکجه شیفاهی خالق ادبیاتیمیزدان اوزاقلاشیریق. باشق مدنیتین عاریه سینه چئوریلرک ایچی بوش مظروف چئوریلیریک.

آنا دیلی هم ده ژنتیک باغلیلیق دئمک دیر. هیچکسین حقی یوخدور الله ین وئردیینی زورلا بنده سیندن آلیب و اونو آلی قویسون. دیل بیز اولوشدوران ژنلرین محصولو اولاراق بیزی باشقالاریندن فرقلندیرن اساس عامیل دیر. بو بیزیم دیلیمیزه اوگئی مناسبتین اوزاق گله جک ده درین فسادلارین توره دیلمه سینه گتیریب چیخاراجاق. هر آخاق اوز کوکو اوسته بیتر. اوز شاعیرلرینی ع یازیچیلارینی و مدنیت خادیملرین تانیمایان خالق باشقالارینین اویونجاغی اولار. میللی حاقمیز اولان آنا دیلین ده تحصیل چورک , سو و هاوا کیمی ضروری دیر. نئجه کی اولکه میزی قوروماق بیزیم هامیمیزین بورجودور. اولکه نین ده بورجودور کی آنا وطنلیق حقینی یئرینه یئتیرسین و قوملر آراسیندا فرق قویمادان هامیمیزا برابر و عدالتلی یاناشسین. سئوگیدن سئوگی دوغار نیفرت دن ایسه دوشمنچیلیک. کیمسه بو تورچاقلاردان حق اولاراق کیمسه دن داها حقلی دئییل. رئال دونیانین طلبلری آچیق آشکاردیر. فارسین دیلی و شاعیری منیم دیلیم و شاعیریم دن اوستون توتولمامالی دیر. منیم ده آنام منه عزیزدی و اونون دیلین هر شئی دن عزیزدیر. قارداشلیغین یولو عدالت دیر. یوخسا امتیازلارین سونو عداوت اولماسین . بیزه دوشن یازیب آیدینلاتماقدیر.بیز ده دیلیمیزده تحصیل اولسون ایسته ییریک بو نعمتین لذتین بیزیم ده بالالاریمیزین یاشاماسینی ایسته ییریک.