علی تقی زاده لاریجان
20 نئچه ایل اونجه ایلک دفعه شاعیری ، آینالی مئشه سینده شیرین بولاغ چیمنلییینده گوردوم . او ایللر، ایلده نئچه دفعه شاعیر ستار گول محمدی نین باشینا توپلانیب طبیعتین قوینونا گئدردیک. سازلی سوزلی مجلسلریمیز اولاردی .او گونده ، جاه جلاللی شعر موسیقی مجلسی قورولموشدی . خان اوغلاندان ایلک جناس شعرین ائشیتدیم . یامان اوره ییمه یاتدی.
ایللر کئچدی . آرا کسیلدی. بیر گون دفتریمده اوتورموشدوم کی قیزیم قاپی نی آچیب دئدی : آتا بیر نفر خدافرینلی موشتری گلیبب. آلدیغی ماشینین سندین یازدیرماغا. ظن ائدیر کی سنله تانیشدی .
گئتدیم سالونا گوردوم خان اوغلاندی . اوپوش گوروش، سورادا ناهارا ائویمیزه گئتمک قرارینا گلدیک.
او گوروش بیر یئنی فورصت اولدو کی شاعیرین دیگر باجاریقلارین تانیام . همده گله جکده ائویمین تیکمه سین اونا تاپشیرام . شاعیر یاخشی بنا ، داها دوغروسو فیکیرلی معماردی .
آراز قیراغیندا تئمیربیلی کندینده یاشیان آغاکیشی آغازاده ، هم ائل آراسیندا خان اوغلان آدلانیر ، همده ائله ائل قویدوغو آدی تخلص سئچیب. منجه شاعیر خان اوغلانین هم عایله وی حیاتی ، همده شخصی کاراکتری دیگر کسلردن تام فرقلی دی . سحرلر کی بیر کتدی حیاتی یاشیان انسان کیمی یوخودان آییلار، تام صمیمی و محبتلی کلمه لر له اولادلارین اویادار: دورایاغا گوزومون ایشیغی ! ایشیمیز وار قاداسی ! هه قادان آلیم ....
اوغلانلاریدا درحال یوخودان آییلیب ، قارشیداکی گوره جک ایشلره مشغول اولوب، گوزل بیر گون باشلایاللار. حتی ایندی کی، فقط کیچیک اوغلو یانیندا و باشقالاری شهرلرده یاشاییللار، شهردن آتا ائوینه قوناق گلنده ده ، ائله قدیمکی سایاق آتالارینین مهربان دعوتینه باش اییب ایشه گیررلر. ایللر اوزونو عایله وی گل گئدیمیزده ، بیر کره ده گورمه میشم کی خان اوغلانین مهربان لحنی دییشسین یا اولادلاردان بیری اونا اورجاه اولان ایشدن گیلیلنسین.
قاپیسی قوهوم اقربادان آرتیق ، شاعیر، موسیقی چی و هرجورا اینجه صنعتله مشغول اولان دوستلارینا آچیخدی.نئجه دیللر اونون ائوی اصل معنادا بابام اوجاغیدی.
خان اوغلان لاپ گنج یاشلاریندا بیر جیپ ماشینی اولدوقدان قره داغ طبیعتین قاریش قاریش تانیییر. او سببدن هردفعه کنده گئدنده خواهیش ائدرم کی بیزی گورمه دییمیز گزملی یئنی مکانلارا آپارسین . دئیه بیلرم کی شاعیر بیر پئشه کار تور لیدر کیمی تانیشا ، یادا خدمت گوستریر. او سفرلرده ، اوزوموزدن باشقا دیگر داغچی لارا یاخشی بلدچی ، همده کومک اولار. یورولان داغچینین شنگین گوتوروب الیندن یاپیشار. یئمک ایچمک اوچون ، یا دینجلمک اوچون اوتوراندا ، تام انرژی ایله چای قویار. گوزل شعرلر اوخویوب یولچولارین ، داغچی لارین اوقاتین شن ، همده اوگونلرین معنالی ائدر. شوبهه سیز، بو دورومدا کی سو چورک دردی ، خسته لیک و هابئله بول بول باشیمیزا یاغان چتینلیک لر هامی نی روحدان سالیب ، هرکس بو گونون نئجه سحر ائله سین یا سحر منی هانسی موصیبت گوزله ییر سانجیسی ایله قاراقاش قاباقلی یاشاییر. آنجاق خان اوغلان چتین لیک لری ریشخندایله قارشیلاییر. گولر اوزلو ، شیرین سوزلو همده چوخ لطیفه ، گولملی ظرافاتلار بیلندی. دئسم کی دوستلارینان گزمه یه گئدنده ، خان اوغلانسیز هئچ نه آلینمیر چوخ یالان اولماز.
**
نئچه ادبی نقد جمعلرینده (مجازی فضادا) اونا بیر شعر شوناس کیمی مراجعت اولار. کئچمیش تورک شاعیرلرو اونلارین شعر صنعتی حاقدا یئترلی بیلگیسی اولان شاعیر دئدیکجه ده تواضعکاردی. هاردا بیر جانا یاتان شعر ائشیدر، ازبرله ییب و جمعلرده مجلس اهلینه اوخویار. بودا اونون قیمتلی خاصیتلریندن بیریدی . آز شاعیر تانیرام کی اوز شعریندن باشقا دیگر شاعیرلرین شعرین خصوصی ذوق شوقیله مخاطبلره اوخوسون. چوخلار چالیشیر کی بیر مجلیسده اوز شعرین اوخوماقلا یا آشیقدان ، خواننده دن بیر شعرین اوخودماقلا اوزون رئکلام ائله سین. هاما خان اوغلان باشقا شاعیرلرین قیمتلی شعرین مخاطبه چاتدیرماقدان حظ آلیر . سانکی حییفی گلیر او جمعیت او شعردن خبرسیز قالسین.
بیر گون خومارلی شهرینین کتابخاسینا کتاب آپارمیشدیم . کتابخانانین مسئولوایله صمیمی بیر صحبته مشغول اولدوق. من سوروشدوم کی : فلانکس بو دوراندا کی مجازی دونیا هامی نین باشین قاتیب ، کتاب اوخوماغا رغبت آزالیب، بوردا وضعیت نئجه دی ؟ آغای کوهی دئدی : بیزیم عمده کتاب اوخویانلاریمیز ، مدرسه اوشاقلاریدی . عمومیتله درسلرینه کومک ائدن کتابلاری آلیب آپاریللار. یادا کتابخانانین مطالعه اوتاغیندا اوخویوللا ر. تکی آغاکیشی آغازاده آدلی بیر نفر یوخاری کندلرین بیریندن گلر، آردیجیل تاریخی و ادبی کتابلار آلیب آپارار. کتابی قایتاراندا، اوخودوقلارین تام دقتله شرح ائدر .حیران قالارام کی آغیر کند ایشیله مشغول اولان بو کیشی نه درین هوسله کتاب اوخویور.
بو سوزلر شاعیر دوستلارا گوزل اورنکدی . قرقشه لی حیاتدا، آغیر ایشلریله برابر کتاب اوخوم
اغا واقت آییرماق ، شخصی معلوماتی زنگین ائتمک بویوک هونردی.
*
شعرصنعتلرینده جناس، ان چتین بیر صنعتدی . بیرجور سسله نن نئچه معنالی کلمه نی تاپیب ، شعرین بناسینا ائله مهارتله هورملی سن کی ، هر کلمه محکم بیر دیوار داشی کیمی اوز یئرینده اوتورا. شعری بیر دفعه اوخوماق سنه قانیخ وئرمیه . بیرده اوخویوب باشقا معنا ، باشقا یئنی لیک تاپیب ، حظ آلاسان . سانکی بیر نئچه مجهوللو معادله حل ائدیرسن یا چتین بیر تاپماجانی آددیم آددیم آچیخلاییب ، جاوابین تاپیرسان . آدی آغیر عنوانلار داشیان معاصر جناس یازان تانییرام کی شعری نین صورتی جناسدی . هئچ درینلی یی ، یوکسک محتواسی یوخدی . خان اوغلان بو صنعتده حقیقتا پئشه کاردی .
گورنده دویغوسوز ، قلبی داش آدام
چاش قالیرام آدام داشدی ؟ داش آدام ؟
اوره یی داشدیرسا، کوکسی داشا ،دام-
آلاجاق قوینونا بیر قبیر ، داشی
اولور سویوخ باخیش یوز ، داغ سینمه
بئله جه چکیلیر یوز داغ سینمه
گزمیشم حک اولوب یوز داغ، سینمه
اورته جک اوستونو بیر قبیر داشی
خان اوغلان سئوگی سیز اودا یانینجان
سئوسن دیه ر یاخینین جان یانین جان
وطن تورپاغیندان گوتور یانینجان
قوربتده اوزونله بیر قبیر داشی
بئش گون دنیا عومرون لکه سیزیاشا.
سیلینمز دای لکه یاخاندان سو را.
هامینن بورجونو ویر وعده سینده.
هچ کس یاپئشماسن یاخاندان، سورا.
دوی دونیانن گئدی گلیندن بئله.
هامیا حرمت ائت گل ایندن بئله.
آرالی گز قیزدان گلیندن بئله.
اوتانما یا بئی دن یا خان دان سورا.
خان اوغلان فکیر وئر گئده گله سن
ایندی من اولمشام یاپش گل، اسن
من دئیردیم ساغلیغمدا گله سن؟
درد منی یاندریب یاخاندان سورا.؟
شمشک تک هیجرانین باغرینی یاررام
اگر یار گتیرسه یاراغی منه
اولسمده قوی اولوم یارین یانیندا
اوخشاسین اوخشاما یار آغی منه
جانان منله اون ایل ایری بیر ایل دوز
دئدیم باری بیر ایل داغیت بیر ایل دوز
یارا حسرت هیجران چکدیم بیر ایل دوز
سونوندا ایچیردی یار آغی منه
عشق اولماسا یا ظولمتم یا تارام
کوکله منی یا کامانام یا تارام
خان اوغلانام اوندا راحت یاتارام
اگر قسمت اولسا یار آغی منه
سنی سولغون گوردوم حالیم دییشدی
اوچوشمور کپنک یوخ آری داغلار
سنین گوزللیگین پوزان کیمسه نین
یوخدی درین حیسی یوخ عاری داغلار
درین بیر ایستک وار یارا سینمده
طبیب یوخ یارامی یارا سینمده
یاراندان دریندی یارا سینمده
دردیم وار دردیندن یوخاری داغلار
چوخدی خان اوغلانین داغ سینه سینده
درد یئغئلیب اولوب داغ سینه سینده
اوزونه یورد سئچیب داغ سینه سینده
آشاغی خان آراز یوخاری داغلار
خان اوغلانین نئجه دیه للر ، گوبه یی جناسلا کسیلسه ده غیرجناس شعرلرده یازیر کی گوزللیکده ، معنادا جناس شعرلریندن قالان دئییل.
گول چیچک اوستو نده شئح دامجی دامجی.
گولون بوداقینی اییر دامجلار.
بویئرلرهامینی شاعیر ائیله ییر.
هرگولدن چیچکدن شعیر دامجلار.
گون دوشدو اولدوز تک شاخدی بیردامجی.
گوزتیکیب گوزومه باخدی بیردامجی.
توخوندو م گول اوستن آخدی بیردامجی.
آیرما چیچکدن دئیر دامجلار.
خان اوغلان دویغوسوزسوز، شعیر اولماز.
شعره اوخشاسادا دوز شعیر اولماز.
دریاجا شر اولسا بیرخئیراولماز.
بیردامجی خئییردن خئییردامجلار
*
منجه خان اوغلانین شعرلری حاقدا اونون یاخین دوستو همده قونشو کندلیسی شاعیر ایلقینا چایلی نین شعری یئرینه دوشوب .
شعر وادبیات عالمینده درین ساوادلی ،صاحب نظر شاعیر عزیز عنایتی کی « ایلقیناچایلی » تخلوصوایله تانینیر ، خان اوغلانین شعرلرین بئله وصف ائدیر:
یانیلمارام دئسم اگر خان اوغلان
گوی دنیزین دالغاسیدی شعرینیز
گوی چمنده بنووشه نین نرگیزین
قرنفیلین سیرغاسیدی شعرینیز
بنزری یوخ نه زنبغه نه گوله
آچیلمامیش خزان وورا توکوله
قورو گولون آغ قانادلی گوی گوله
قاطار ووران دورناسیدی شعرینیز
بیر ایشیقدی بیر مایاقدی الینده
سونن دئییل هر قاسیرغا یئلینده
آنان سنه اوز آناسی دیلینده
ایلک چالدیغی لایلاسیدی شعرینیز
سوز یاد اولسا یادداشینا او، بادا
زحمتینی او وئرمه میش او، بادا
دادلی دوزلی قئز گلینین اوبادا
بیشیردیگی یوخاسیدی شعرینیز
سئغاللادین ساچلارینی گونشین
تئل تئل اولموش تئللرینین قئریشین
گوی قورشاغی دالیسینجا یاغیشین
اوزاتدیغی هاناسیدی شعرینیز
اوینا ماییب هئچ کیم گورن گوزیلن
سنین کیمی آتشیلن کوزیلن
مئنجئق کیمی اینجه لیک له دوزولن
گوزللرین یاخاسیدی شعرینیز
رسامیسان هشته سرده قالانین
رسمه چکدین تور توکونتی ، قالانین
سئحرمانین قوزینده لالانین
یایا قالمیش تالاسیدی شعرینیز
بیل قدرینی بو نعمتین قاداسی
بئله بیتمز هر برکت تارلاسی
چوخلاری نین باشینداکی سئوداسی
خیالیدی خولیاسیدی شعرینیز
بیر دیلین وار نه سووشان نه سولان
دیل دئییل کی قاریشیبدی بالیلان
باهار کیمی چیچک له نن آچیلان
گول گوزللیک دونیاسیدی شعرینیز
یوز ایل بئله یازیب یاراد آقارداش
توکنمه سین اومیدینله یان یاناش
هر اوتنی والح ائدن یاشیل باش
ایلقینانین صوناسیدی شعرینیز
جناس خان اوغلانا اوزون عومور ، جان ساغلیقی ، داها گوزل یازیب یاراتماق آرزولاییرام .
1404 یای کرج