ائل اوغلو
قم شهرینده، آیت الله گلپایگانی کیتابخاناسی نین ال یازمالار بؤلومون کئچمیش مسئولو ، نوسخه شوناس عالیم، اوستاد ابوالفضل عرب زاده نین دفترینده بیر چوخ الیازمالارا کاتالوقلار حاضیرلایاننوسخه شوناس عالیم « صدرایی خویی» ایله تانیش اولدوم. همن ایلک و سون گؤروشوموزده اوستاد « صدرایی خویی» تورک دیوانلار اوزره آختاریشدا اولدوغومو اؤیرندیکدن سونرا، یادگارهدییه اولسون دئیه، منه بیر CD پای وئردی. ایسته ردیم یئری گلمیش سایغیلی عالیمین هدییه سینه و مرحمتینه گؤره بیر داها تشککورلریمی بیلدیرمیش اولام. مؤحتواسی تکمیل بیر ادبی «جونگ» اولان او CD ده 70 نفردن آرتیق تورک ادبیاتی نین تانینمیش شاعیرلرینین شعیرلری واردیر . الیمیزه چاتان واراقلاریندا هئچ بیر آد و عنوان ایله قئیده آلینمایان و ایندییه ده ک کاتالولاشمایان او آدسیز «جونگ»ده تورک ،عرب و فارس دیللرینده یازیا آلینمیش نادیر شعرلرین آراسیندا فضلی تخللوصلو شاعیردن بیر تورکجه غزل نسخ اولونموشدور. بیلدیگیمیز کیمی، آذربایجانین بؤیوک شاعیری محمد فضولی نین شاعیر اوغلو «فضلی»نین تکمیل دیوانی الده ائدیلمه سه ده، اونون باجاریقلی شاعیر اولدوغو تدقیقیاتچیلار طرفیندن ثبوت اولونموشدور.و کلاسیکلریمیز آراسیندا اوندان باشقا فضلی تخللوص ائدن بیر شاعیریمیز یوخدور.سؤزو گئدن جنگ ده اولان همن تورکجه غزلی آشاغیدا درج ائدیریک. آختاریشلاریمدا ،بو گونه دک بو شعیرلرین بیر یاندا نشر اولوندوغونو تاپمادیغیم اوچون، بو غزلی فضلی یارادیجیلیغینین یئنی تاپینتیسی کیمی دیرلندیریره م. بیر ادبی تحفه اوسون دئیه، ایلک نشرینی ده یرلی خداآفرین مجلله سینده سایغیلی اوخوجولار اوچون چاپ ائدیریک. غزلین اسکی قرافیکاسینی و چاغداش قرافیکادا اوخونونشونو اسکی متن ین کوپیاسی ایله بیرگه آشاغیدا اوخویوروق:
متنین اسکی قرافیکادا اوخونوشو:
هردم بو جانی عشق اودینه یانه صقلرم
بر جانکه شوقنه یانمیه پس یانه صقلرم
هر کوردوکک چراغه کوکل دوشمه بن سنی
بر اوزکه شمعه یانمغه بروانه صقلرم
دوشدک کمند زولفنه اوصلنمدک کوکول
عمرم دوکندی بن سنی دیوانه صقلرم
کل ای اجل امان ویر امان المه جانمی
یارک بن آنی وصلنه شکرانه صقلرم
جان فضلینیک قتنده امانتدر ای اجل
ورمم من امانتی جانانه صقلرم
شعرین چاغداش الیفبا قرافیکاسیندا اوخونوشو:
ساخلارام
هردم بو جانی عشق اودونا یانه ساخلارام،
بیر جان کی شؤوقینه یانمیه، پس یانه ساخلارام.
هر گؤردوگون چیراغه کؤنول دوشمه ، من سنی،
بر اؤزگه شمعه یانماغا پروانه ساخلارام.
دوشدون کمند-ی زولفونه اوصلانمادین کؤنول،
عؤمروم دوکندی، من سنی دیوانه ساخلارام.
گل ای اجل امان ویر، امان! آلما جانمی،
یارین من آنی وصلینه شوکرانه ساخلارام.
جان، فضلی نین قتندهامانت دیر ای اجل،
وئرمه م ، بن امانتی جانانه ساخلارام.[1]