میرزا محمدعلی خان صفوت
)1336-1259(
شیخ محمدحسن واعظ اوغلو میرزا محمدعلی خان صفوت 1259-جی ایلده آتا-بابا یوردو تبریز شهرینده ایشیقلی دونیایا گؤز آچمیشدیر. دینی مکتبلرده تحصیل آلیب، گنج یاشلاریندا روحانی لیباسی گئینمیشد‌یر. او، خالق اوچون سؤیله دیگی نیطقلریله شیخ محمد خیابانی حرکاتینا قاتیلمیش، اونو حمایه ائتمیش و بونا گؤره ده، شیخ محمد خیابانی حرکاتی دئوریلدیکدن بیر گون سونرا، حاکمیت قوه‌لری طرفیندن یاخالانمیش و ائوی قارات ائدیلیب، یاندیریلمیش‌دیر.
او، آذربایجان ادبی جمعیتینین فعال عضولریندن اولدوغونا گؤره، همین جمعیت طرفیندن آذربایجان معاریف ایداره‌سینین مسئولو تعین
یازان : ائل اوغلو
اولور و سونرا تبریز ده دانشرای مقدماتی معلمین مرکزی نین صدری اولور. «فرهنگ آذربایجان» و «داستان- ی دوستان» آدلی ایکی کیتاب یازمیش و چاپ ائتدیرمیشدیر. او آذربایجان‌دا میللی حؤکومت یاراناندا زامانی دا او حکومته یاردیمچی اولور. همین ایللرده تبریزده «ادبیات صحیفه‌سی» آدلی بیر درگینی نشر ائد‌رک، ارتیجا قوه‌لریله موباریزه آپاریر. 1324-جی ایلده تبریز فهله حرکاتینین رهبرلیینه سئچیلیر، بیر فهله تشکیلاتچیسی کیمی چالیشیر.
1324-جی ایلده پاریس عموم دونیا همکارلار ایتفاقلاری کومیته‌سینه تبریزدن بیر نوماینده اولاراق چاغریلمیشدیر. او، میللی حؤکومت زامانی «شاعرلر مجلیسی»نین فعال عضولریندن بیری اولور و میللی حؤکومت دئوریلدیکدن سونرا، محمدعلی خان صفوت ده مینلرله اجتماعی- سیاسی فعال کیمی حبس ائدیلیر و بیر مدت تبعید اولونور. او آزاد اولدوقدان سونرا قم شهرینده یاشاییر. 1337-جی ایلده قم شهرینده وفات ائدیر و اورادا دفن ائدیلیر.
جلیل نامه
محیط-ی جهل دن اینسانلاری عرفانه سؤوق ائتمک،
اولور مومکون، ذکا دن الده اولسا مشعل-ی فیطرت.
سعادت خیدمت-ی میللت‌دیر، آنجاق کیمسه ایسترسه،
ظفریاب اولماغا لازیم‌دیر، اولسون هیمت و غئیرت.
نئجه باور اولور بینایه نابینا اولا رهبر،
گرک ارشاد اوچون آیینه اولسون صورت او سیرت.
مگر هر طفل-ی ابجدخوان اولارمی موللا نصرالدین،
قلمی، پرچمی حورریت اولموش، دفتری فیکرت.
وطنه عاشق شیدا، جلیل اولقدر اولان موللا،
یاشاسین حؤرمتی دونیا دورونجا، من آلیم عیبرت.
اولا
خوشدور ائی دیل مؤوسوم-ی گول یار اولا، گولزار اولا،
باده نوشا- نوش اولا، آواز اولورسا تار اولا.
صبح اولا ، نرمک نسیم-ی صبح موشک افشان اولا،
نم-نم-ی باران گلستان ایچره گؤوهر بار اولا.
دیلگشا اولماز گول-ی دل اهلی عرفانه مگر،
قطره-ی اشک آشنای صفحه -ی روخسار اولا.
سینه‌ده خوشدور یانا دل شمع تک شؤعله چکه،
یاندیرا اطرافدا هر گونه خس یا خار اولا.
حوضه-ی اصحاب-ی معنی، محفل-ی ارباب دل،
بزم-ی عیشرت اولماز، ایللا غم اولا، غمخوار اولا.
هر نه ده خوشدور محببت اهلینه صحبت ولی،
اهل-ی دل بزمینده، درد-ی دل گرک رفتار اولا.
دل آدی بؤهتاندیر عشقین، دردی اوندا اولماسا،
کارگر آدی دئییلمز بیر کسه، تا، کار اولا.
درد دل عشق اینسانا مخصوص، چکینمه عشقدن،
دیده -ی دیلبر اولور دیلکئش، اگر، بیمار اولا.
کیمسه ناموس و شرف ایستر وطندیر عهده دار
اولمارام لاقئید فطرت، منزیلیم گر دار اولا.
داد ائیله
یا منی گوشه- ی چئشمینله گؤزوم، یاد ائیله،
یا اسیره‌م، منی بو قئیددن آزاد ائیله.
هونریم مئهر و وفادیر، امگیم جؤور و جفا
ائیله، اینصاف بو سئودا ده منی شاد ائیله.
باور ائیله کی، کؤنول خانه‌سی‌دیر کعبه-ی حق
ائتمه تخریب، چالیش کعبه‌نی آباد ائیله.
نه ثمر ناز ائده‌سه‌ن اهل-ی نیازه گؤزلیم،
مومکون اولدوقجا نیاز اهلینه ایمداد ائیله.
توتالیم وئردی طبیعت سن ایچون قدرت و جاه،
اؤزونو خلقیمیزه کیم دئدی جللاد ائیله.
توده‌نین ناله و اشکی سنه گر زحمت اولور،
چاره یالنیز بودو، لاغئیر ، اونا داد ائیله.
هر نه عکسه‌ن بو یقیندیر بیچه‌جکسه‌ن ده اونو
ایندی کؤنلون نه ده ایسترسه پریزاد، ائیله.
میرزه جواد واقفی «سارابلی واقف»
(هیجری قمری 1263 – 1326)
مشروطه دؤورونون شاعرلریند‌ن سارابلی میرزه جواد واقفی 1263- هیجری قمری ایلده ساراب شهرینده آنادان اولموش و اوشاق ایکن آتاسینی الده‌ن وئرمیشدیر. واقف مشروطه حرکاتینین ایشتراکچیلاریندان اولاراق، حرکتین وصفینده شعیرلر یازمیشدیر. یازدیغی شعیرلر داها آرتیق نؤوحه و مرثیه اولسادا، او زامانین موقاویمت ادبیاتینا مخصوص اولان مؤوضوعلاردا دا شعیرلری واردیر.
میرزه جواد واقفی «سارابلی واقف»1326 - هیجری قمری ایلده دونیاسین ده گیشیب ،ساراب شهری نین ایمامزاده سینده تورپاغا تاپشیریلمیشدیر. شعیرلریندن اؤرنکلر اوخویاق :
بیرده چتیندی شاهسوه‌ند‌ن گه ون گله
ایرانی قارت ائتمه‌یه هر بیر گلن، گله
مشروطه شرط بالتاسین ترسه ساپلادی
آی خان! داغیت تیفاغینی، آی... چنگه‌له...
آز قالدی، داغدا، یایلاغینا، شاهسوه‌ن گله
گیزلنمگه، سیچان یوواسی، خلقه گئن گله
آز قالدی، عالمین، عملی هرج- مرج اولا
ایرانه قتل و غارت اوچون هر گلن گله
یورتچو قورتاردی مالی، داراشدی آت- ائششگه
شهره اینانمایین گلن ایلده‌ن گه ون گله
مشروطه شرط بالتاسنی ترسه باشلادی
شهری کسیر توسعه یامان قالدیق انگه‌له
توتدو آیاق جریمه ایله روشوه تازه‌دن
آی خان! داغت یواسنی، آی موللا چنگه‌له
هجو شیخ الاسلام
شیخ‌الاسلام خدادان نقده‌ر غافیلیمیش
نئجه بی رحم، مروت نئجه آهن دیلیمیش
گئجه شامنان سورا بیلیدیک قلعه جون منزیلیمیش
نئجه منزل در و دیوار گنه ایلن زلی‌میش
گلدی چرخ چرخ سسی، صبح اولدی، هامو دوشدی یولا
بیر نفر جاهیلیمیش، بیر نفر آهیلیمیش
میر عزیزده چاروقون گئیدی قوشولدی بولارا
پا پیاده یولا دوشدی ایله بیل کی فیلیمیش
گون چیخاندا یئتوشوب اوج دانا سوت قارداشینا
بیری شنگول بیری منگول بیرکوفلنگولیمیش
عصر وقتی یئتوشوب واسمشا چوخ سرعتیلن
گون چیخوب قار ارییوب کپرونون آتلی سلیمیش
یئتوشوب تبریزه میرهاشم ائوین آلدی خبر
دئمه میرهاشیم‌نن زال طرفیندن الیمیش
میرزه جعفر نقوی خامنه
(1362-1265)
میرزه جعفر نقوی خامنه حاج شیخ علی اکبر اهرابی اوغلو 1265- جی ایلده تبریز شهرینده آنادان اولموشدور. گنج چاغلاریندا آنا دیلیندن ساوای فارسجا ، فیرانسیزجا ، روسجا و عربجه‌نی یاخشی بیلیردی و او دیللرده یازیلاریدا اولموشدور. ائله جه ده همن دیللردن تورکجه‌میزه ده چئویرمه لری اولموشدور . او، گنج چاغلاریندا مشروطه اینقلابینا قاتیشمیش و بیر اینقلابچی کیمی یئتگینلشمیشدیر.
میرزه جعفر نقوی خامنه، سعید سلماسی و میرزا تقی خان رفعت کیمی قاباقجیل شاعرلرله بیرگه ایراند‌ا یئنی اوصلوبدا اولان سربست شعیرین ایلکین بینووره‌سینی یاپانلاردان اولموشدور. اونون فارسجا و تورکجه شعیرلری یاشادیغی ایللرین قازئت و ژورناللاریندا بیر موباریز شاعر کیمی درج اولونوردو.
او، یئنیلیکچی بیر شاعیر کیمی «جعفر خامنه ای آدیله ده قئیده آلینمیشدیر. پهلوی رئژیمی حاکمیته کئچند‌ه ن سونرا، ادبی،ایجتماعی و سیاسی جریانلاردان کانارا چکیلیب، عاددی بیر وطنداش کیمی یاشامیش و هئچ بیرایجتماعی فعالیت ائتمه میشدیر. بئله نظره گلیر کی، انزوا ایختیار ائتمیشدیر.
او، دؤورونون مطبوعاتیندان و هیندوستان‌دا ایشیق اوزو گؤره‌ن مشهور « حبل المتین » قازئتینین اونوچونجو ایلینین ایگیرمی یئدینجی سایئند‌ان عربلرین آدلیم یازیچیسی جورجی زئیدانین « هارون الرشیدین باجیسی عباسه » اثرینی فارسجایا چئویرمیش و اورادا آردیجیل اولاراق چاپ ائتدیریمش‌دیر.سایین تدقیقاتچی رضا همرازین قئیدلرینه گؤره، همین اثرین اؤن سؤزونون سونوندا رحمت‌لیک میرزه جعفر نقوی خامنه بئله قئیده آلمیشدیر:
( تبریز ) شوال ۱۳۲۳ هجری – مترجیم . بو قئیددن بللی اولور کی، همین اثر هله شانلی مشروطه اینقلابیندان بیر ایل اؤنجه تاماملانمیشدیر. تبریزلی تدقیقاتچی«رضا همرازین یازدیقلارینا گؤره میرزه جعفرین ائولادلاریند‌ان الده ائدیله‌ن شعیر مجموعه‌سینین آراسیندا« صایب » تخللوصو ایله بیرسیرا تورکجه شعیرلر همن دستختله قلمه آلینمیشدیر. تدقیقاتچی آیدینلاتمیش کی، او،گنجلیک ایللرینده تورکجه شعیرلرینی « صایب » ایمضاسی ایله یازیب و چاپ ائتدیرمیشدیر.
میرزه جعفر نقوی خامنه ۱۹۸۳ –جو ایلده ائله دوغولدوغو تبریز شهرینده دونیاسینی دگیشمیش و اورادا دا تورپاغا تاپشیریلمیشدیر. اؤرنک اولاراق گنجلیک عمرونو موباریز ادبیاتا و اونون یئنی‌لیکچیلیگینه حصر ائد‌ن میرزه جعفر نقوی خامنه نین شعیرلریندن اوخویاق:
ای گؤزل سالدی بلایه منی مستانه گؤزون
راه-ی بیداد توتوب قصد ائله‌دی جانه گؤزون
جانه میننت سانیرام عشق بلاسین جانا!
قورخورام لیک بو سئوداده باتا قانه گؤزون
بیر باخیشند‌ا چیخاریر خلق-ی جهانی یولدان
نه بؤیوک آفت ایمیش مذهب و ایمانه گؤزون
شوبهه یوخدور کی وئریر دین متاعین الد‌ن
گؤرسه بیر عشوه‌سینی عالیم-ی فرزانه گؤزون
بیر گلستان-ی ملاحتد‌ور او روخسار-ی قشنگ
نرگیس آسا سالیب آشوب او گلستانه گؤزون
گؤزلرین مووجی منی قرق ائله‌ییب دریاوش
غم یئمز اولسا جاهان قرقنه دریانه گؤزون
بو دیل-ی زار و پریشی گؤره‌جک سیلسیله بند
بیر نیگاه ائتسه او گیسوی پریشانه گؤزون
«صایب» ین نظر- ی لوطفونده ازلدن گؤزو وار
سالما گؤز‌دن اونو، قوربانی او مستانه گؤزون.
وطن یولوندا
وطن یولوندا شهادت بؤیوک سعادتدیر
سعادت-ی ابدی ایسته‌سن شهادت‌دیر
باخین یئگانه پرستانه اخذ-ی عیبرت ائدون
شهادت اونلارا عالمده ارث او عادتدیر
باخین وطن نسل-ی احراره یالواریر سؤیلور
ندنمی یوخلامیسیز؟وقت عرض-ی هیمتدیر
نسار-ی جاندان احرار ائیله مز ایمساک
کی ، بذل جان و سر اونلارجا بس شرافتدیر
ره-ی وطنده او تن کیم قیزیل قانه بویانمایا
بسان-ی لاله گلستان-ی عشقه زینت دیر
او باش کی گئتمه‌یه میللت یولوندا، حمل ی اونون،
حمییت اهلی یانیند‌ا بؤیوک مشققتدیر
اول ال کی عرسه -ی هئیجاده اولمایا مقتول
شیل اولسا ساحبینه آرتیق ایستراحت دیر
او دیل کی قیمایا مئیداندا دوشمن تهدید
کسیلمه‌یه اونا شایسته بوکوم و لوکنتدیر
او یوز کی قان ایله توپراغیله اولدو آغوشته
طریق-ی حققده شمس-ی سما رفعتدیر
او گؤز کی دوشمه‌نه یاغدیرمایا شرار-ی مرگ
وورولماغا اوخ ایلن نورو وارسا ظولمت دیر
قده‌م اگر اولمایا مئیدان-ی رزمه ره سپار
شاقاقلوسلا شایستة هلاکت دیر
کؤنول اگر غم-ی مللت ده قان ایلن دولسا
غم ائتمه کاسه-ی سرشار فئیض و رحمت دیر
تخللوف ائتمه‌یه اعضا گرک حققیندن
قیلارسا هانسی تخللف جدیر-ی لعنت دیر
بو گونده طرز سخن « صایب » آ بو گونه گرک
کی خط و زولفله اوغراتماغین خسارت دیر .
_______________________
کریم آغا صافی تبریزی
(1265 -1325 )
شعیرده صافی تخللوصو‌لو ایله تانینان کریم آغا صافی تبریزی مشهدی حاجی اوغلو1265-جی ایلده تبریزین سورخاب محله‌سینده اورتا دوروملو بیر عائله‌ده آنادان اولموشدور. او، گنجلیک ایللرینده نووحه شعیری یازماغا باشلامیشدیر. کریم آغا صافی تبریزی ، گئت –گئده شعیریمیزین باشقا نؤوعلرینده ده قلمینی سیناقدان کئچیرمیش و ادبیات تاریخیمیزده قالا بیله‌ن شعیرلر یازمید‌ی. اونون ایجیتماعی گؤروشو خالقین ایسته دیکلریله عینی دورومدا‌دی.او،فارس و تورک دیللریند‌ه دولغون، مؤحتوالی و تأثیر ائدیجی شعیرلر یازاراق یاشادیغی ایللرده ایشیق اوزو گؤره‌ن مطبوعات‌دا نشر ائتدیرمیشدیر. صافی،یاخیندان مشروطه اینقلابینین شاهیدی و اونون طرفدارلاریندان اولموشدور.تبریزده تئزار سالداتلارینین الی ایله دارا چکیله‌ن مشروطه‌چیلری یاخینندان گؤرموش و اونلارا شعیرلر حصر ائتمیشدیر.
صافی شئیخ محمد خیابانی حرکاتینا قوشولموش و قلمی ایله اینقلابین اؤن جبهه‌سینده دایانانلاردان اولموشدور. شعیرلری او ایللرین شعیر پرستیشکارلارینین دیل ازبری اولموشدور. بیز اونون شعیرلرینده عیرفانی لوغتلره و عیرفانی ایصتلاحلارا دا تئز-تئز راست گلیریک.
کریم آغا صافی تبریزی نین نووحه‌لری و شعیرلری دفعه‌لرله تبریزده چاپ اولوبدور. او،1325 - جی ایلده تهران‌دا وفات ائتمیش و مزاری شاه عبدالعظیم زیارتگاهینین جیواریند‌ادیر. شعیرلریندن اؤرنکلر اوخویوروق.
وطنه
ای وطنه بذل ائله ین نقد-ی جان
ملته دار اوسته وئرن امتحان
یاده سالاندا وطن آغلار سیزه
صافی شیرین سخن آغلار سیزه
****
چکه‌دیله داره سنی منصور وار
تاپدی شرافت سن ایله چوب-ی دار
یاده سالاندا وطن آغلار سیزه
صافی شیرین سخن آغلار سیزه
****
خیدمت ائدیبسن وطنه، دینه، سن
بیزه‌دن او آثاری، یئنه دئینه سن
اولدو وطن کفرین الینده اسیر
سن بیلرسن ملتیمیز نه چکیر
یاده سالاندا وطن آغلار سیزه
« صافی » شیرین سخن آغلار سیزه
***
شکر اولا اللاهه وطن شاد اولوب
قئید سیتمدن هامی آزاد اولوب
ظلم گئدوب مملکت آزاد اولوب
قانلا صفا تاپدی باهار-ی وطن
گولشن وفا اولدو کنار-ی وطن
جانیمیز اولا خوشدو نثار-ی وطن
***
ای وطنه بذل ائلیه ن نقد جان
ملته دار اوسته وئره ن امتحان
محو اولا مشکل دی بو نام و نشان
قانلا صفا تاپدی باهار-ی وطن
***
یاسه باتیب یاسمن آغلار سیزه
بولبول شیرین سخن آغلار سیزه
یاده سالاندا وطن آغلار سیزه
قانلا صفا تاپدی باهار-ی وطن
چکدیله داره سیزی منصور وار
تاپدی شرافت هامی دار و دیار
بسدی سیزه بو شرف و افتخار
قانلا صفا تاپدی باهار-ی وطن
آهیمیزین گورکیله آثارینی
پوزدو قوی پنجه لر افکارینی
کشف ائله دی خائنین اسرارینی
قانلا صفا تاپدی باهار-ی وطن
خدمتیزین حوسنو نمایان اولوب
اهل وطن خرم و خندان اولوب
قبرلریز رشک گلستان اولوب
قانلا صفا تاپدی باهار-ی وطن
________________________
11- میرزه محمد هجری
)1334-1261)
میرزا محمد هجری کربلایی عباس اوغلو 1261-جی ایلده «هئریز» قصبه‌سینده دیندار بیر عائله‌ده آنادان اولموشدور. ایلک تحصیلینی دوغما یوروندا موللا مکتبینده و قوران درسینی ایسه، موللا سیفی آدلی بیر دین عالیمیندن آلمیشدیر. او، میرزه علی تفلیسی آدلی بیر شخصدن ده سعدی نین «گلستان» کیتابینی اؤیرنیر. دئیله‌نلره گؤره، او، ۱۵-۱۶ یاشلاریندان شعیر یازماغا باشلامیشدیر. ۳۰ یاشیندا ائوله نیر. لاکین ائولی‌لیگی داوام ائتمه ییر. نیسا آدلی حیات یولداشیندان آیریلیر و شیراز شهرینه کؤچور. میرزه محمد هجری ۱۰ ایل شیراز شهرینده قوربت حیات یاشایاندان سونرا، ۴۱ یاشیندا تبریزده مسکونلاشیر. او، تبریزه گلرکن کؤمور ساتانلار کاروانساراسیندا حاجی میرحسن عللاف آدلی بیر تاجیرین کاتیبی اولور. سونرا او کاروانسارادان بیر دوکان آلیر و کؤمور ساتماقلا پول قازانیر. ایجتماعی مضمونلو شعیرلر یازیر. زامانه‌دن ائتدیی شیکایتلری کاغازا یازیب گئجه‌لر دووارلارا و قاپیلارا یاپیشدیراراق خالقی اؤز اعتراضلاری ایله تانیش ائدیرمیش. او، تبریزده یاشایان زامانلاردا بیر سیرا شاعرلرله ادبی گؤروشلر گئچیریرمیش. اونون «کاشانه» («یووا») آدلی ماغازاسی شاعر دوستلارینین ییغینجاق یئرینه چئوریلیمیشدیر. 1311- جی ایلده تبریزه گوجلو سئل گلیر، بیر چوخ آوادانلیغی داغی‌دیر و اؤزو ایله آپاریر. میرزه محمد هجری نین ماغازاسینی دا سئل آپاریر. او، یئنه یوخسول اولور و 1311-جی ایلده شاهرود شهرینده کیبریت کارخاناسیندا کاتیب ایشله ییر.
۱۷ ایل اورادا یاشایاندان سونرا یئنه دوغما قصبه‌سی «هئریزه» دؤنور. 1334- جی ایلده همین قصبه‌ده خسته‌له نیر و وفات ائدیر. مزاری «هئریز»شهرینده دیر. اونون شعیرلری وفاتیند‌ان ۷۳ ایل سونرا هم یئرلیسی اولان دیرلی تدقیقاتچی و ساتیریست شاعر محرم فرزانه‌نین کؤمگی و سعیی ایله 1397- جی ایلده تبریزده «آیتکین»نشریاتی طرفیندن چاپ اولموشدور. فارس و تورک دیلینده اولان ایجتماعی و لیریک دیوانی گؤستریر کی، داها چوخ تنقیدی شعیرلر یازمیشدیر. اثرلری آرا-سیرا قدیم ال یازما مجموعه‌لرینده ،«هئریز» قصبه‌سینین تاریخ و ادبیاتینا ایشاره اولونان یئرلرده اؤرنک اولاراق وئریلمکده دیر.
وئردیم سلام دیلبریمه احترام ایله،
آشوفته خاطر اولدو اولموش سلام ایله.
من بیلمه دیم جواب-ی سلامیم ایتاب اولور،
بیقدر ائیله دیم اؤزومو فیکر-ی خام ایله.
ساقی، پیاله میننتی چکمک خیلاف‌دیر،
ایچدیکجه من شراب، سن گتیر جام ایله.
مشهور بیر مثل‌دی کئچه‌نلر دئیبدیلر،
گئتمز بیر آرخا عالیمین آبی عوام ایله.
مرغی کی، زیرک اولدو، یئمز دانه -ی-فریب،
صیاد صئید ائدنمز اونو هیچ دام ایله.
فرهاد-ی کوهکن گر اولایدی معاصریم،
اولفت توتاردی «هجری»-ی شیرین کلام ایله.
***
آی بوغلارین جهالت الیله بوران کیشی،
نفسین سؤزو ایله خانه-ی عقلی یئخان کیشی.
رحمان-ی عقل‌دن نه ضرر گؤرموسه‌ن؟ بویور،
شیطان-ی نفسه سیندیریسان گیردکان کیشی.
قلبین دؤنوبدور داشه کی، یوخدور حیمایتین،
توپراقلی آرپانی باری وئرمه گیران، کیشی.
دؤور‌نده آج یاتانلارین آهی توتار سنی
دؤرت مین ریاله خرواری بوغدا ساتان کیشی.
چوخلار سنین کیمی فقرانین قانین سوروب،
آخیرده قان قوسار، بیلیرسن، قان سوران کیشی.
میسکینلرین قانیله دولان شیشه‌لر سینار،
اولماز دوروست عدالت الیله‌ن سینان، کیشی.
اظهار علم و-فضل ائیله میرم نظم و نثرایلن،
«هجری» آزانلارا وئریر یول نیشان، کیشی.
****
سیار ائله‌ییب هوشومو جانانه‌لر، ائی دیل،
دیوانه دئییرلر منه فرزانه‌لر، ائی دیل.
قم چکمگیله‌ن، قوی منه دیوانه دئسینلر،
حئیران قویار آغیللری فرزانه‌لر، ائی دیل.
سن ایسته‌مه کی، سیرر ضمیریم اولا ظاهیر،
با پرده اولار نغه -ی ریندانه‌لر، ائی دیل.
قان اولماگیله‌ن گؤز یاشیمی ائیله‌مه گولگون،
تؤکمه یوزومه تا گؤره بیگانه‌لر، ائی دیل.
گر شوعله-ی-شمع اولماسا، اولماز کی مویسسر،
اؤز باشینه یانسین‌پر-ی پروانه‌لر، ائی دیل.
بو گوشه-ی غمده دوزره‌م ریشه-ی نظمی،
من‌دن سورا منشور اولا دوردانه‌لر، ائی دیل.
«هجری» قاپیسین باغلادی اغیار یوزونه،
«کاشانه»ن اولار مفخر کاشانه‌لر ائی دیل