صدیار وظیفه ائل اوغلو
من شعریمی هئچ قاپییا آپارمادیم!
من شعریمی بیر آن بئله،
چارپیشماقدان قوپارمادیم!
شعریم اؤزو باغیرارکن ،
من شعریمی باغیرمادیم!
شعریم اؤزو چاغیرارکن ،
من کیمسه نی دینلمه‌یه ،
چاغیرمادیم!
من شعریمه قوربان وئردیم چؤره ییمه،
من شعریمه حصر ائتمیشم دیله ییمه،
سؤویکه میشم اوره ییمه! ... (کریم گول اندام)
اوخودوغوموز بو میصرعلر اینقیلابی - ایستریک شعریمیزین اؤتن یاریم عصردن بری ایشیق اوزو گؤرموش اؤرنکلرینین اؤنملی پارچالارینداندیر. اونوتمایاق کی،حقیقی بیر ضیالی اولاراق بیزیم قاباقچیل ادبیاتیمیزین آیدین دوشونجه لی قلم صاحیبلری، هئچ واخت اؤزگه قاپیسنا گئتمه میش و اؤز منلیگینه، اؤز جسارت و غئیرتینه دایاناراق چؤرک اوچون دیزه چؤکمه میشلر. البتده کی،یوز ایللردیر بو گئدیش ائله میللی غروروموزو قورویوب ساخلایان یوزلرله فداکار یارادیجی اینسانلاریمیزین گئتدیگی مقدس یولو اولوبدور.
عصرلر بویو عیبجرلیکلره، یالتاقلیق و آلچاقلیقلارا قارشی موباریزده اولانشاعیر و یازارلاریمیزین ادبی نمونه لرینده بیز بو خصوصیتی چوخ حالاردا تاپیریق. گووه ندیگیمیز هر بیر ادبی سیما ائله بئله اولدوقدا بیزیم اولا بیلیر،یوخسا بیزیم اولا بیلمزدی. میللی شعوروموزو نسیلدن-نسیله اؤتورن هر بیر مقدس آماللی الی قلملی ائله اؤزگه قاپیسینا گئتمه دن خالقیمیزین اوره گینده قالا بیلیبدیر.
«سؤزوم وار سنه دونیا» آدلی شعیر کیتابیندا درج اولونان شعیرلریله تانیش اولدوغوم ده یرلی شاعیریمیز « گول اندام» ین جذبه لی شعیرلرینه همیشه سایغی ایله یاناشیب، دیققتله اوخوموشام. بونون ایلک سببی هله ده یاخیندان اوزونو گؤرمه دیگیم بو نوواتور شاعیرین یازدیغی جذبه لی شعیرلر اولوبدور. « گول اندام»ین یارادیجیلیق حیاتینی نظردن کئچیرنده، اونون ایکی ادبی نسیلین هم اوخوجوسو و همده همن ادبی نسیللرین یارادیجیلاریندان اولدوغونون شاهیدی اولوروق.شعیر عالمینه گلدیکده کلاسیک قالیبلرله مئیدانا گلن شاعیریمیز یئنیلیکچی بیر شاعیر کیمی،آذربایجانین جنوبوندا مدرن شعیر قالیبینین آیاق توتدوغونو گؤردوکده زامانلا آددیملاییر و مدرن شعیرمیزین طرفدارلاریندان اولاراق سربست فورمالارین دا قدرتلی شاعیری اولور، و همن فورمادا درین مضمونلو شعیرلریله یولونو داوام ائدیر.
او، هئچ بیر شاعیری یانسیلامادان اؤزو آچدیغی بیر ادبی جئغئرین یئتیشمه سی اولوب دئسه ک هئچ ده یالنیش فیکیر دئمه میشیک. اینانیرام کی زامان گلرسه، فلسفی- ایجتیماعی شعیرلری ادبی تنقیدچیلریمیزین میز اوستو کیتابلاریندان اولاجاقدیر.
اونون یازدیغی قالارقی شعیرلر، چوخ حاللاردا ایجتیماعی-سیاسی حیاتیمیزین سیلینمز لوحه لری
کیمی دوشونجه میزی عکس ائتدیرن تابلولار کیمی تاریخی حافظه میزین گالرییاسیندا پارلایان مضمونلار اولاجاقدیر. او، صنعت صنعت اوچوندور دئیه نلردن اولدوقجا اوزاقلاشیب و صنعت خالق اوچوندور دئیه نلرین و بو دئییمه عمل ائدنلرین اؤن سیراسیندا گئنلردن بیری اولوبدور. اونوتمایاق کی، اؤتن یاریم عصردن بری قیسیلا-قیسیلا عرصه یه گلن شعیر دونیامیزدا هله ده لازمی قدر مئیدانا چیخمایان شاعیرلریمیز چوخدور. البتده کی، تاریخ و فولکلوروموز کیمی تدریس اوجاقلاریندان اوزاق اولان ادبیاتیمیزین بو کیمی اؤرنکلری ائله زامان گلدیکجه اؤز دیرینی گؤستره بیله جکدیر.یادیمدادیر کی، اورمولو شاعیریمیز« گول اندام» ین«سؤزوم وار سنه دونیا» آدلی کیتابینی تهراندا « اندیشه نو» کیتاب ماغازاسیندان آلدیغیم گونلرده، او زامان تبریزده نشر اولونان ده یرلی «ارک »هفته نامه سینده هر هفته « ایللرین قانادیندا» باشلیقلی آز حجملی بیر یازیم چاپ اولونوردو. نئچه ایل داوام ائدن او سئریال مقاله لریمین 36-جی ساییندا2/4/1378 تاریخینده « گول اندام» حاققیندا یازدیغیم او آز حجملی مقاله نی بیرده داها اونون بو گونکو اوخوجولاریله بیرگه اوخوماق ایستردیم. بئله ی: " آذربایجانیمیزین باغلی- باغاتلی، آللی – یاشیلی شهری اولان اورمو شهرینده آنادان اولوب، اورادا بویا باشا چاتان شاعیرلریمیزین بیری ده قدرتلی شاعیر «کریم گول اندام»دیر. اؤز صمیمی شعیرلریله بو گونکو شعیر دونیامیزی چیچکلندیرن «کریم گول اندام»ین اثرلری گؤستریر کی، دونیا گؤرموش، حیات و ادبیاتی باشا دوشموش بیر شاعیردیر. بیز اونون شعیرلرینده کلاسیزمین جذبه لرینی و چاغداشلیق روحونو تاپا بیلیریک. ایلک شعیرلر توپلوسونو اللی یاشاینا واردیقدا چاپ ائتدیریب اوخوجولارینا چاتدیران شاعیر داها آرتیق کلاسیک شعیریمیزین آنا خطدی اولان اؤگود، مصلحت، سئوگی و سعادت مضمونلو مؤوضولاریندا محتوالی شعیرلر یازمیشدیر. اونون شعیرلرینی اوخودوقدا بیر دوشونجه لی شاعیرین دونیامیزدان آلدیغی لذتلر و آغری- آجیلاری دوشونوروک. او، ایجتیماعی – فلسفی شعیرلرینده بشر ائولادینی سئوگییه، عدالته، قارداشلیغا چاغیریر. «کریم گول اندام»ین ایلک اثری اولان« سؤزوم وار سنه دونیا» آدلی شعیر مجموعه سینی اوخویاندا شاعیرین اورک دؤیونتولرینی آنلاماق داها آرتیق مومکون اولور. او، اؤز شعیرلرینده بو گونوموزده بشر حیاتینا حؤکم ائدن دولام- دولاشیق یاشاییشا آجیلانیر،حاییفسیلانیر و بعضا ده قان آغلاییر. او، اینسان عؤمرونون بوتون لحظه لرینه قیمت وئرن شاعیردیر. او اینسان حیاتینی تام مثبت حاللاردا اولدوقدا سئویر.«کریم گول اندام» چاپ اولموش شعیرلرینده اؤز باجاریغینی بیزه ثبوت ائتمیشدیر. ایندی بارلی- بهرلی عؤمرونون اللی ایکینجی باهارینی سورمکده اولان(1378 جی-ایلده) «گول اندام» ین چوخ بعدلو شعیر دونیاسینی آچیقلاماق یقین کی آز حجمده یازیلان مقاله میزه سیغمایاجاقدیر. اونون شعیرلرینده احساسلا صنعت قول- قولا وئرمیش و بیزی چاغداش شعیریمیزین روحونا مالیک اولان اوغورلو صنعت یولونا چاغیریر. ائلیمیزه، یوردوموزا و بوتون انسانلارا سئوگیلر بسله ین و قایغی چکن اورمولو شاعیریمز « گول اندام» حضرتلرینه اوزون
عؤمور،ایلهاملی قلم آرزولاماقلا اونون بیر شعرینی بیرلیکده اوخویاق:
یئرینی تاپ
آغیر اوتوروب باتمان گل،
اؤز یئرینده قال خان کیمی.
قوردان اولماز الده مشعل،
کول اولارسان قالخان کیمی.
اولگوج کیمی قیرخانماسان،
وولکان کیمی چالخانماسان،
قیلینج اولوب قالخان کیمی..."
بورادا قئید ائتمک ایستردیم کی، اوستاد شاعیریمیز« گول اندام»ین آنا دیلیمیزده یاریم عصردن آرتیق بیر دؤورو توتان ادبی عؤمرونو واراقلاماق ایسته ییریکسه، یقین کی، شاعیریمیزین اؤز قلمی اونون حیاتیندان دانیشارسا ، داها دا جذبه لی اولار. اودور کی، « ادبی چلنگ» باشلیقلی مقاله لریمین هامیسیندا آراشدیرمامیزدا اولان عالیملرین مونوقرافیاسینی اؤزلریندن آلدیغیم کیمی، قوجامان شاعیریمیز« گول اندام»ین دا ، مونوقرافیاسینی ائله اؤزوندن آلدیق. مجله نین چاپ ایمکانلارینا داییر رئداکته ائدیب، اؤزل سایین اوخوجولارینا هدیه ائدیریک. اوستاد شاعیریمیزی بیر داها دا بارلی- بهرلی عؤمرونون 78-نجی باهارینین چیچکلنمه سی موناسیبتیله تبریک ائدیریک. یازیچی،ترجومه چی ، آراشدیرماجی وقوجامان شاعیر اوستاد « گول اندام» اوچون اوزون عؤمور، شن یاشاییش و ادبی نائیلیتلر آرزولاییرام.
خرداد1404- ائل اوغلو