دیرلی خدافرین اوخویانلاری و چوخ عزیز و اصیل میللتیمیز، 2023 –جو ایلین باشلانغیجی و 1402 –جی ایلین یاخینلاشدیغی بو گونلرده بویوک اولوسوموز چوخ کدرلی فاجعه لرله اوزلشدی. چوخ آجی و اونودولماز تاریخی کدرلری یاشامالی اولدوق.

وطنیمیزین خوی بولگه سینده باش وئرمیش زلزله دوغرودان – دوغرویا هامیمیزی ماتمه غرق ائدی. سویوق قیش گونلری و داغ شرایطلی جغرافی اراضی ایله یاناشی اقتصادی چتینلیک گوزل اینسانلاریمیزی زلزله ایله برابر چوخ چتین و چیخیلماز دوروما سوخدو.

آنجاق ائل بیرلییی هر زامان اولدوغو کیمی گئنه ده آجیلارین خفیفله لمه سینده و یارالارین ساریلماسیندا اوزونو گوستردی. ائل و ملت اولاراق بوتون گوجوکوزله زلزله زده سویداشلاریمیزین یانیندا اولدوق. انشالله جوخ عزیمله بو گونلری گئری ده قویاجاغیق و یئنی دن گوزل حیاتین قورولماسیندا بیر بیریمیزه آرخا و دایاق اولاجاییق.

خوی دئپرم حادثه سی و آجیسینین آردینجا تورکیه ده قهرمان ماراش مرکزلی چوخ ییخیجی و داغیدیجی زلزله باش وئردی. بو اولای تاریخین ان بویوک فلاکتلریندن بیری کیمی "عصرین فلاکتی " تاریخه دوشدو. اونلاردا بیزیم جان پاره لریمیز اولاراق ائلیمیزی درده – کدره غرق ائدی.

بیرگئجه ده 100 میلیارلار خسارت آلان قارداشلاریمیز البته کی هامیمیزی درین اندیشه یه بوغدو. بوتون دونیا تورکیه یه یاردیما قوشدو. آنجاق 10 مینلرله اولو و یارالی البته کی حافظه ی تاریخیمیز ده کدر و ماتم دولو سیلینمز ایزلر قویدو. دونیا انسانینی سارسیدان بویوک فلاکت بیر داها اینسانسلیغین نه قدر اونملی اولدوغونو بیزلره آنلاتمیش اولدو آنا طبیعت.

البته فاجیعه لر گلر و گئچر آنجاق دوستلوق – قارداشلیق یادداشلارا حک اولار و تاریخ ده قالار.

قارداش اولوس اولاراق بوتون تورکیه دکی قارداشلایمیزا گئچمیش اولسون دیللکلریمیزی سونوراق دئییریک سیزینله ییک عزیز تورکیه خالقی و باشیمیز ساغ اولسون. تانری یاردیمجینیز اولسون.

بو گونلر آردی – آراسی کسیلمه ین آجی خبرلرله دولدور. درد اوسته درد گلیر. ائلیمیزین چوخ سایقین و دیرلی خالق شاعیر استاد حسین کریمی مراغه ینی ده قایب ائتدیک. باشین ساغ اولسون آذربایجان . الله استادا غنی – غنی رحمت ایله سین. روحو شاد اولسون .مکانی جنت اولسون ، عایله سی و سونلرینه خدافرینچیلر اولاراق باش ساغلیغی دیله ییریک.

آذربایجان ادبیاتی پارلاق اولدوزونو ایتیردی. مرحوم کریمی پهلوی رژیمینین قارانلیق و خوفلو دورونده طنز آدی ایله ده اولسا دیلمیزی و شعیریمیزی یاشاتماغی باجاردی.

او هم دوره لری کیمی یوردوموزون آجی آسیملاسیونونا قارشی دیرندی و سسینی اوجالتدی. بولود قارچورلو سهند و شهریارلا ال – اله وئره رک هره سی بیر جبهه دن مبارزه ائتدیلر.

اساس او قارانلیقدا آنا دیلیمیزی قوروماق و دیری ساغلاماق ایدی کی ، منجه ده بونو باشاردیلار.

استاد کریمی دیرلی و برکتلی عمر پایینی آذربایجان اولوسونون دیلینه و ادبیاتینا صرف ائدی. تمناسیز و متواضع بیر عمر سوردو.

ادبیاتیمیز و تاریخی یادداشیمیز اونو اونوتمایاجاق.یولو – یولوموزدور . اوجا روحونون قارشیسیندا بیزه امانت ائتدیکلرینی محافظه ائدرک داوام ائدیره جییک.

قارشیدان یئنی ایل گلیر . یئنی گون (نوروز) بایرامی گلیر. تانریدان میللتیمیز ساغلیق ، موتللوق ، فیراوانلق و قضا و قدر دن اوزاق بیر ایل آرزو ائدیریک.

یئنی ایلینیز موبارک و برکتلی اولسون انشاالله.گئنه سیزلرله اولاجاغیق و بو شرفلی یولو سیزلرله یورومه یه داوام ائده جییک. گوزل خالقیم. گوزل ائلیم. غیرتلی ائلیم.