مدیر مسئول : دکتر حسین شرقی دره جک (سوی تورک)

چاغداش دونیامیزین ان گوزل چاغلاریندا اولکه قاجارلاردان آلیناراق پهلوی (بو آد قوندارمادی. ح.ش) اصلینده رضا میرپنج دئییلن ایلخی باشینا تحویل وئریلدی.ایللر بویو قاجارلارین دوزونو و چوره یینی یین بو شخص سون ضربه نی انگلیس خنجری ایله تورک سویلو قاجار خاندانینا آرخاسیندان وورموش اولدو .

انگلیس ایرانین نفت و دیگر طبیعی ثروتلرینه گوز تیکمیشدیر. ائله بونا گورده اوز الچیلرینی باشچی کیمی میلته سیریمیش اولدو. بو چئوریلیشین نتیجه سی قاجار علیه دولتین ده و سونرالار ایران آدلانان دولت ده دئمک اولار کی ؛ تورکلرین هر جهت دن سونونو گلدیینین گوسترگه سیدی.

اسلام دونیاسیندا رفرم یا همان مشروطه آدی آلتیندا ایلک اولاراق عثمانلی تورکلرین و سونرا ایسه قاجارلاری حاکمیت دن سیلمه یی باجاردیلار. بیزلره ستارخانلاری قهرمان کیمی گوسترسه لرده اصلینده اونلار دا بیلرک یادا بیلمیه رک تورکون حاکمیتدن سیلینمه سینه ماشا اولدولار.

آنجاق رضا میرپنجین آیاغی شاه کوشکونه چاتار چاتماز اونون آنتی تورک سیاستلری اوزونو گوسترمه یه باشلامیش اولدو.پلانلی شکیلده هر بیر آذربایجان و باشقا تورک اهالیسنی آسمیلاسیونا معروض قویودولار. دیل ؛ دین ؛ و میللی کیملیک زمینین ده بوتون مادی و معنوی دیرلریمیز پان آریاییزمه قربان ائدیلدی. بئله لیکه تورک دیلی اکثریتی تورک اولان اولکه ده یاساقلاندی. تبریز شهری ایلک چاپخانه شهری اولسا بئله اورادا تورکجه کیتابلارین باسیلما و یایینلانماسی قدغن ائدیلدی. تورک مدنیتینه اولومجول ضربه لر وورولدو. مکتب لرده تورک دیلینین تدریسینه حکومت قرارلاریلا سرد قاداغالار قویولاراق آنا دیللی کتابلار محو ائدیلدی.رسمی یئرلرده تورکجه دانیشماق یاساقلاناراق تورک انسانی و اونون مدنیتی آشاغالانماغا باشلاندی. وطنداشلاردا تورک اینسانینا و اونون دیلینه ؛ تاریخینه ؛ فولکلور و ادبیاتینا کوتولمه کمپلکسی یارادیلماغا چالیشیلدی.

توپونیملر دیشدیریلمه یه باشلاندی. یئر آدلاری ساختا و قوندارما فارسجادا معنی لندیریلرک تماما غیر تورک آدلارلا عوضلندیریلدی. بونا میثال اولاراق ( خیاو شهری- مشگین/ اوجان ایسه بستان آباد/ قوشا چای ایسه میاندوآب/ قاراداغ ایسه ارسباران و یوزلرجه بئله جغرافی جعلیلشدیرمه حیاتا گئچیریلدی.

او گونکو ضد تورک سیاستی بو گون ده تورکلرین یوخ ائدیلمه سینده اوز درین و سیلینمز ایزلرینی گوسترمکده دیر.

45 ایل دیر کی بو منفور حاکمیتین سقوطوندان گئچیر. آنجاق او گونگو دشمنجه سینه آلینان قرارلارین نتیجه سی بو گون ده قارا بولوط کیمی هر بیر تورکون باشینین اوسوتونده دیر. زور و قورخو گوجونه ائدیکلری ایندی قانونی و مشروع اولاراق قارشیمیزی کسمک ده دیر. چوخ شئی اولدوغونداندا بتر داوام ائتمکده دیر. انگلیسین گیزلی و باش آلدادیجی سیاستینین یئرینی آنتی تورک فرانسه سیاستی آلماقدادیر.گونوموزده بئله منیم دوغولدوغوم قاراداغ بولگه سینده دئمک اولارکی یئر و یورد آدلارینین 80 فایزی دییشدیریلمیشدی.میثال اوچون گلیسی کندی اولموش گلوسنگ. دمیرچی کندی اولموش حددادان و س.

حال حاضیردا تورکلر دونیانین گئدیشاتیندان تاثیرلنرک اوز میللی کوکلرینه صاحیب چیخماغا جهد گوسترسه لرده عظیم بیر پسیکولوژی و اداری باسقی ایله اوزله شیرلر. عادی المنتار حاقلارین طلبی چوخ آغیر سوچلامالارلا نتیجه لندیریلیر.

بونلاردان بیری دوغال اولاراق یئنی دوغولان اوشاقلار تورکجه آدلارین وئریلمه سیدیر. دئمک اولارکی تورک آدی قویان هر بیر والدین آیلار و ایللرله ثبت احوال و محکمه لرده سوروندورولور.

ایش یئرلرینه یا شیرکت آدلاریندا تورک آدلاری استفاده ائتمک دئمک اولارکی یوز 90 یاساقدیر.

10 ایللرله تحقیره و تحجیره معروض قالمیش اصیل تورک مدنیتی حال حاضیردا اونا منسوب اولان و یادا باشقا وطنداشلار طرفیندن مختلیف اجتماعی تحقیر ائدیجی و آشاغالامالارلا او جومله دن جوک و اله سالما یاخود گولونج مکانیزمالارینا چئوریلمکله اصالتین ضدلمک و اونون سیرا دیشی ائتمک کیمی جهدلرله قارشی  قارشیادیر.   

مدنیت و تحصیل باسقی و مجبوریتی نتیجه سینده تورک دیلینده یازی یازماق هوسی یوخ سویه سین ده دیر. عادی بقال حساب کتابینی تورکجه آنلاتسادا اونو کاغیذ اوزرینده یازاندا مطللق فارس دیلینده یازار.

بیر عسکر هیچ فارسجا بیلمه ین آناسینا بیر مکتوب یازسسا اونو تورکجه دوشونوب اما فارس دیلینده یازار. آناسی ایسه ان سئودیی بالاسینین مکتوبون ترجمه ائتدیررک آنلاماغا چالیشلار.

50 ایل پهلوی دورونون بیز تورکلره ووردوغو ضربه نه یازماقلا بیتر نه ده آنلاتماقلا.

بو گونکو گون ده ده بو سورونلارین آرادان  قالدیریلماسینا نه دولت نه مدنی و سوسیال قورولوشلار هیج بیر یاردیم ائتمز. او قدر بو تورکو تحقیر و محو ائتمک درین قاتلارا ائنمیشدیر کی بئله تورکلر چوخ اوزلرینی زاواللی و مدنیت دن یوخسون حیس ائدرک اوزلرینی بو وضعیتدن قورتارماغی بئله عقللرینین اوجوندان گئچیرمزلر.

پهلویلرین تورکلره باشلاتدیغی کولتورال گئنوساید آرتیق هم تورکلرین هم ده فارسلارین ایلیک لرینه قدر گیرمیش و نتیجه سی ده گوز قاباغیندادیر.

دولت گوجونو آرخاسیندا گورن فارسلار و بو گوجون ایستر گئچمیش رژیم و ایستر ایندی اونلارین یانیندا اولماسیندان اوز گوونلرینین یوکسک حدده اولماسینا گون کیمی اینانیرلار.تحصیل سیتمی ؛ مطبوعات ؛ رسمی دولت دیلی ایستاتوسو ؛ رادیو تلویزیون و س کیمی قورویوجو و اینکیشاف ائتدیریجی فاکتورلارین اونلارین مدنیت و دیللرینین یانیندا اولماسی البته کی اونلاردا معنا روح یوکسکلیی یارادیر. ایسته دیکلرینی ایسته دیکلری یئرلده ائده بیلمک ایمکانینا مالیک دیرلر.

آنجاق تورک مدنیتی و تورک اینسانی بیر اولکه وطنداشی اولملارینا رغما هیچ بیر سادالانان حوقوق و اولاناقلاردان یارارلانما حقوقونا مالیک دئییلدیرلر.حتی تمل و ابتدایی حاقلارین طلبی او جمله دن آنا دیلینده تحصیل؛ دوغما یئر و اینسان آدلارینین قورونوب و یایقینلاشماسی؛تلویزیون  سایر مطبوع ارگان وارلقلارینین اولماسی ان اساسی برابر و قارداشجا حق و حقوقا ییه لنمک دییلدیینده مختلیف نوع برچسب لرله او جومله دن پان تورکیزم ؛ تجزیه چی؛ بیگانه پرستلیک و س سوچلامالارلا اوز- اوزه قالا بیلیرلر. بونلارین هامیسی پهلوی رژیمینین غیر انسانی و غیر ملی سیاستینین بو گونکو یانسیمالاریدیر.

آتالار دئمیش : بیر دلی بیر گوله بیر داش آتار مین عقللی اونو چیخارا بیلمز.

بو کیمی محدودیتلر سایماقلا بیتمز یاشادیغین اولکه ده آچیب قولاق آسماغا بیر رادیو ؛ بیر تلویزیون ؛ بیر سینما ؛ بیر تئاتر ؛ بیر فرهنگی ؛ بیر علمی ؛ بیر تفریحی یئر اوز دیل و مدنیتینده یوخدورسا اینسان اوردا اوزونو نئجه حیس ائتمه لیدیر گورسن.

باخمایاراق ایندی او زامانا گوره آز دا اولسا سربستلیک واردیر. لاکن بیر مدنیتین و دیلین یادا ادبیاتین اینکیشافی اوچون مطلق دولت دسته یی اولمالی دیر. آلت یاپی ایمکانلاری پارلل یارادیلمالیدیر. هیچ اولماسا بولگه سل یا دا جغرافی اقلیم لر کیمی.

ائدیلن باسقیلارا مرحم اولماقدانسا یارالاریمیزا دوز باسماغا نه گرک واردیر. ذاتا بیزیم مدنیت جان اوسته دیر. بیزه تپیک – دابالاق یوخ جان سویو لازیم دیر. اوشاقلاریمیز ذاتا دیلیمیزی بیلمیرلر.تورکجه بیلنلرده استانبول تورکجه سینه اوستونلوک وئریرلر. یوزده 98 فایز تورکلر اوزلر دیللرینین یازیسینین اولدوغونو بیلمیر. هیچ بیر تورک شاعیرینی تانیمیر . ضرب المثلرینی بیلمیر. هیچ بیر تورک بیلیم اینسانینی تانیمیر. کولتور قهرمانی اولان شاعیری و یا خواننده سی یوخدور.

بیز تورکلر ایندی بو اولکه غرب مشهورلارینی تانییریق. تورکیه هنرپیشه لرینی کوکدن تانییریق.آذربایجان دا بیر چوخ شاعیر و خواننده لری تانییریق. حال بو کی بیز اولکه نین آپاریچی میللتلریندن بیری آولدوغوموز حال دا نه بیر باخاجاق فیلمیمیز نه بیر قولاق آساجاق توره لی خواننده میز نه ده اوخویاجاق بیر کیتاب البته آنا دیلیمیزده یوخدور. بیز نیما یوشیجی تانییریق اما حبیب ساحیری تانمیریق/ بیز حافظی تانییریق اما نسیمی تانیمیریق/ سعدینی تانییریق اما محمد فضولینی تانیمیریق/ ماکسیم گرگینی ؛ عزیز نسینی ؛ بالزاکی ؛جک لندنی ؛دیکنزی ؛ جان اشتاین بکی ؛ شولوخوفو ؛ داستایوفسکینی ؛ لئو تولستویو ؛صادق هدایتی ؛ علی شریعتی ؛ یاموک ؛ اورهان پاموکو ؛ چخوف و اونلارجا بونلاردان تانییریق. اما اوز به اوزوموزدن اولانلاری تانیمیریق. نیه ؟ چونکو پهلوی بیزیم ضیا چیراغیمیزی سوندوروب و یاغ یئرینه قان ؛ هده ؛ قورخو دولدوروب.

تورکلر بو اولکه نی قوروب و قورویوبلار آنجاق اجحافا اوغراییب یوخلوغا معروض قالیبلار. بیزیم شیفاهی خالق ادبیاتیمیزی مکتبلرده اوخودسانیز دییر مین اروپالینین ادبیاتینا. تورکون " سو ", " یارادیلیش داستانی " ؛ " قاراخان داستانی " و آشیق ادبیاتینی اوشاقلاریمیزا اویردسه نیز مینلرله غربین آسیملاسیون دییرمانیندان قوروتولموش اولاریق. پهلوی دییشدیریلدی آنجاق اونون بیزه قارشی توتومو حالا دوام ائدیر؟...

 گوره سن نیه؟